NA MINISITA NI TABAGONE KEI NA QITO LAISENIA TUITUBOU

Nodra vosa ena soli ni yaya ni canteen e na vanua vaka turaga ko Naiviqiri, Navakasiga, Bua ka vakayacori ena siga Vakaraubuka nai ka 26 ni Okotova 2018

Ni tiko saka na Turaga na Buli Navakasiga,
Ni tiko saka na i Talai ni Kalou Bula,
Ni tiko na i Vakalesilesi ni Matanitu
Na lewe ni Vuli,
Kei kemuni na vulagi sureti o ni tiko rawa e daidai.

Miau Bula Re,

Taumada au via vakaraitaka na noqu vakavinavinaka ena veikidavaki kei na veivakataukeitaki sa mai vakayacori vei au kei ira na i vakalesilesi ni Minisitiri ni Tabagone kei na Qito.

E ka talei saka vei au na yakavi vinaka nikua ni’u bau sureti me mai dua saka na noqu i tavi e na kena mai soli tiko na i yaya vakarautaki me baleta na nomudou bisinisi ni veivoli.

E soli saka na kena draki ka sa noda i tavi me da na vaka lesuya tiko ga na vakavinavinaka ki vua na Tamada sa cecere sara.

E vu mai na sasaga qo e dua na vuli koni sa lako curuma mai ka mai vakatutu taki kina na kena duri e dua na nomuni bisinisi na tabagone me na vukea na veivoli e nakoro ka ni’u vakabauta ni a vu vakatabikidua ga mai na dredre ni veitosoyaki e na nomudou vanua vaka turaga.

Au via vakavinavinaka vei kemuni yadudua sara na lewe ni soqosoqo ni tabagone oqo ena nomuni mai vakacavara vakataucoko na vuli oya.

Au gadreva ga me’u vakananumi kemuni ena i naki ni vuli ka koya:

a) Oqo na kena vakatorocaketaki na itabagone ena kilaka vakacakacaka
b) Na vukei ni nomuni cakacaka ni veivakatorocaketaki vakatamata yadua kei na kena vakaitikotiko

E sala muria sara vakavoleka na vuli oya na sasaga ni matanitu, sai koya na kena kau mai vakavoleka na veivakatorocaketaki ena taudaku ni veikoro vakavavalagi me vaka e dou sa vakadinadinataka tiko e dai.

Na veivuke se veivakatoroicaketaki oqo ena vakilai vakalevu sara ena nomuni cakacaka vata ka me vukea na tubu cake vaka i lavo ni itikotiko.

E da raica ni sa vakaitavi taki koya sara tiko vakalevu na matanitu e na kena vakatoroicaketaki na noda vanua ka dua na usatu levu ni sasaga oqori sai koya na kena vakarawarawataki vei kemuni na lewe ni vanua na nomuni ciqoma na veivuke e so me na vukea na nomuni rawa ka.

Esa koto talega ena i tuvatuva ni matanitu na nodra vakagumatuataki se vakatorocaketaki na bula ni itabagone ka me veivuke talega ena noda sasaga me da vukei keda ga vakataki keda.

Sa koto kina na nuinui ni matanitu ni na vakatoroicaketaki na bula ka vu mai na sasaga oqo ka na tosoi tiko na kila ka me vukea na nomuni toso ki liu.

Sa dua na vakaraitaki vinaka na nomuni sasaga mo ni sa vakaduri bisinisi e na loma ni nomudou vanua vakaturaga e na kena cicivaki e dua na bisinisi ni veivoli.

E sa dodoliga mai kina na Tabacakacaka ni Tabagone kei na Qito e na kena vaka i yaya taki na nomudou bisinisi ni veivoli. Sa nuitaki ni na vukei kemuni sara vakalevu e na rawa ka vaka ilavo kei na veivakacakacakataki.

Au sa gusu ni nomuni Tabacakacaka kei na Matanitu e na vakavinavinaka e na kena tokoni tiko na sasaga levu qo ni veivakatoroicake taki.

Me’u tinia, sa koto na bolebole vei kemuni yadudua sara moni na tomana tikoga na sasaga yaga oqo ka sa tu vakarau na Tabacakacaka ni Tabagone kei na Qito me vota mai vakatikina na nona veivuke vei kemuni.

Mo ni kalougata tiko ena nomuni veisiga ni mataka ka me toso tiko ga ki liu na nomuni sasaga.

Sa Vinaka vakalevu.